Кадетскиот тим на Тинекс Пролет продолжува со одличните настапи, откако нашите млади ракометари забележаа нова импресивна победа, овојпат на домашен терен против градскиот ривал Скопје со убедливи 50-28.

Кадетите на Тинекс Пролет одиграа импресивен меч доминирајќи во нападот од првата до последната минута, покажувајќи карактер и не дозволувајќи ритамот да опадне во ниту еден момент од натпреварот. Гостите парираа само до 5-4, по што нашите играчи ја презедоа контролата, набрзина поведоа со 14-7, а потоа на одмор заминаа со 25-13.

Убедливото водство беше задржано и во текот на второто полувреме, избраниците на Тотиќ и на Матлиески не само што ја задржаа двоцифрената позитива, туку и успеаја во финишот таа да ја надмине границата од 20 гола, на крајот славејќи со преубедливи „плус 22“.

Деспотовски со седум гола беше најефикасен во таборот на Тинекс Пролет, шест постигна Александров, а мора да се истакне и одличната игра на Мартин Стојановски, членот на нашата пионерска екипа кој доби шанса за кадетите и блесна со шест погодоци, сите во второто полувреме.