Тинекс Пролет прокнижи нови бодови на суперлигашката табела откако вечерва успеа да триумфира на натпреварот против Радовиш со 23-19. Цврстата одбрана беше наш заштитен знак на овој натпревар, максимално ги лимитиравме опциите на гостинот во нападот, што го трасираше патот до оваа заслужена победа.

По десет минути игра резултатот гласеше 4-2, а благодарение на расположениот Василевски пет минути подоцна позитивата беше качена на „плус четири“ (7-3). Истиот ракометар нешто подоцна реализираше за 9-5, но Радовиш успеа да се врати до крајот на полувремето и во 28. минута од пенал да израмни на 10-10. Палевски ја прекина серијата на гостите, но на одмор се замина со израмнети 11-11, по погодокот што го постигнаа радовишани на една минута до крајот.

Тинекс Пролет беше подобар ривал и на стартот од второто полувреме, одбраната беше на највисоко ниво, гостите постигнаа само два гола во првите 13 минути и избраниците на Матлиески поведоа со 16-13. И повторно по тајмаутот на тренерот Котевски гостинскиот состав ја консолидираше играта, дојде на само еден гол негатива, по што Матлиески реши да побара тајмаут при 18-17 на нешто повеќе од седум минути до крајот. 

Шилегов постигна важен гол, а од тој момент, па се до крајот, Тинекс Пролет повторно доминираше на теренот, одбраната функционираше беспрекорно, а во нападот неколку гола во серија постигна Атанасовски, ставајќи печат на победата на крајот изразена со конечните 23-19.